Ֆելինաթերապիա. բուժում կատուների օգնությամբ

Երբևէ նկատե՞լ եք, որ կատուները մոտենում են ընտանիքի այն անդամներին, ովքեր իրենց վատ են զգում, պառկում կողքին և, որոշ ժամանակ անց, մարդիկ թեթևություն են զգում: Այս թերապևտիկ արդյունքն ուսումնասիրում է գիտության առաձին ճյուղը` ֆելինաթերապիան, որն ուղղված է կատուների օգնությամբ տարբեր տկարությունների բուժմանը:

Բուժում կենդանիների օգնությամբ

Աշխարհում գոյություն ունեն «կենդանաթերապիայի» մի քանի տեսակներ. դելֆինների, օձերի, ձիերի և շների օգնությամբ:«Շներով» թերապիան (կանիսթերապիա, լատիներեն kanis` շուն բառից) մյուսներից ավելի երկար պատություն ունի: 1790թ. անգլիական Յորքշիր կոմսությունում ստեղծվեց մի կազմակերպություն, որը հիմնեց հիվանդանոց` հոգեկան հիվանդների համար: Հիվանդանոցում զսպաշապիկներ չէին օգտագործում, իսկ դրա փոխարեն կիրառում էին բուժման նոր մեթոդներ, այդ թվում` շների օգնությամբ: Բժիշկները նշում էին, որ շների շնորհիվ հիվանդները հազվադեպ էին ագրեսիա դրսևորում և ավելի քիչ էին տառապում նոպաներից: Արդյունքում շների բարենպաստ ազդեցության ուսումնասիրությունը շարունակվեց և ձևավորվեց մի ամբողջ ուղղություն` պետ-թերապիա, որի մի մասն էլ կազմում է ֆելինաթերապիան (լատիներեն felis` կատու):

Ֆելինաթերապիան այսօր

Մեծ Բրիտանիայում և ԱՄՆ-ում, օրինակ, կատուների հետ շփումը կիրառում են մտավոր հետամնաց երեխաների, հոգեկան հիվանդություններով տառապող մարդկանց, սրտի խանգարումների, գլխուղեղի վնասվածքների բուժման համար:

Ինչ վերաբերում է հոգեկան խանգարումներին, ապա «կատվաթերապիա» հանձնարարում են այն մարդկանց, ովքեր իրենց փորձից գիտեն, թե ինչ է դեպրեսիան: Կատուներն օգնում են նաև շիզոֆրենիայով, նևրոզներով,  մոլագարությամբ տառապողներին: Կատուների ներկայությունը նպաստում է նաև վերքերի ապաքինմանն ու ոսկրերի ամրացմանը,  համենայնդեպս, դա են հաստատում Հյուսիսային Կարոլինայի կենդանիների հետ շփման ինստիտուտի գիտնականները: Նրանց կարծիքով,  կատուների մլավոցը նման է ուլտրաձայնային բուժմանը: Պրոֆեսոր Կլինտո Ռուբինը հայտնաբերել է, որ 20-50 հերց դիապազոնով ձայնի ազդեցությունն ավելացնում է աճը և 20%-ով ամրացնում ոսկրերը:

Ինչպես է դա կատարվում

Ըստ էության, ֆելինաթերապիայի սեանսի ժամանակ անսովոր ոչինչ տեղի չի ունենում: Պացիենտը նստում է կատվի հետ, որը գգվել է նրան, մլավում է, լիզում ձեքերը, մի խոսքով` իրեն պահում է քնքուշ կատվի պես, որը շփվել է ցանկանում: Սակայն, գիտնականների կարծիքով, դա էլ բավական է, որ մարդն իրեն լավ զգա: Իմիջիայլոց, երկար տարիներ կատու պահողներն առանց մասնագետների էլ գիտեն այդ մասին. յուրաքանչյուր ոք, ով տանը կատու է պահել, շատ պատմություններ գիտի այն մասին, թե ինչպես է կենդանին օգնել տիրոջը, երբ նա հիվանդացել է: Ամենից հաճախ կարելի է լսել այն մասին, թե կենդանին ինչպես է մոտեցել, պառկել տիրոջ կողքին կամ ցավացող տեղի վրա և, որոշ ժամանակ անց, ցավը նվազել է կամ լրիվ վերացել:  Այդ բուժարար ազդեցության բացատրությունը, հնարավոր է, թաքնված է հոգեկան գործընթացների մեջ. մարդը ջերմություն է զգում, հասկանում, որ ինքը մենակ չէ և, այդ պատճառով էլ վիճակն ավելի է թեթևանում:

Ֆելինաթերապիայի սեանսի ժամանակ կատուների քանակը կարող է տատանվել` մեկից մինչև մի քանիսը: Սակայն դժվար է միանգամից մի քանի կատու գտնել: Հարկ է նշել, որ կատուներն առանձնանում են իրենց անկախ բնավորությամբ և դժվար է գտնել քնքուշ կենդանիների, որոնք պատրաստ են մարդու հետ շփման մեջ մտնել և, դա միշտ չէ, որ հաջողվում է: Դրա համար էլ մասնագետները, ովքեր զբաղվում են ֆելինաթերապիայով, շատ բարձր են գնահատում որոշ կատուների լավ վարքագիծը:

Հարցեր, պատասխաններ, մեկնաբանություններ